Viðtalið við Sigurð Gísla Pálmason ættu sem flestir að lesa

Viðtalið í Fréttablaðinu við framleiðanda kvikmyndarinnar Draumalandið er frábært ekki síður en myndin. Sigurður Gísli Pálmason kemur þar skýrt til skila boðskap sem á erindi við sem flesta. Þótt hann hafi sjálfur fyrirvara gagnvart stjórnmálaflokkum falla sjónarmið hans að mínu mati í einu og öllu að hugmyndum Vinstri grænna um framtíð íslensks samfélags. Greining Sigurðar á  því sem gerst hefur hér á landi síðustu 10-15 árin er í senn skörp og hittir í mark. Það er athyglisvert að lesa slíkt uppgjör frá einstaklingi sem aldist upp við rekstur stórs fjölskyldufyrirtækis og taldi sig vera til hægri í stjórnmálum. Auk þess að vera holl leiðsögn getur viðtalið skerpt og dýpkað skilning manna á kvikmyndinni og er því kærkomin greinargerð frá framleiðanda þessarar einstaklega góðu myndar.

Hér skal aðeins bent á eitt efnislegt atriði af fjölmörgum sem ástæða væri til að draga fram úr viðtalinu. Sigurður Gísli bendir á hvernig ríkið þröngvaði sér inn með Kárahnjúkavirkjun og álbræðslu á Reyðarfirði. "Þetta átti stóran þátt í að setja efnahagslífið á hliðina. - Fyrir hrun ætluðu menn aftur af stað og ráðast í framkvæmdir tvöfaldar á við Kárahnjúka. Eftir hrun ætla menn enn þá að ráðast í þær framkvæmdir. Sem sagt; það sem kom okkur í kreppuna á að koma okkur út úr henni. Þetta er skelfilega undarleg hugsun."

Viðtalið finna menn í Fréttablaðinu í dag, laugardag, á bls. 16-18.