Samfylkingin tvíátta eins og Framsóknarflokkurinn - opin í báða enda

Af skrifum framkvæmdastjóra Samfylkingarinnar er ljóst að flokkurinn veit ekki í hvorn fótinn hann á að stíga. Að þessu leyti er jafnt á komið með Samfylkingunni og Framsóknarflokknum. Sennilega er að verða tímabært fyrir þessa flokka að sameinast eða a.m.k. mynda með sér bandalag. Eftir samþykkt Framsóknar nú á flokksþingi að sækja um aðild að Evrópusambandinu er komið það bindiefni sem kann að hafa vantað.

Bæði Samfylkingin og Framsókn bera mikla ábyrgð með Sjálfstæðisflokknum á því hvernig komið er fyrir íslensku þjóðinni. Samfylkingin spilaði undir og stundum fyrstu fiðlu með útrásinni og tengsl hennar við Baugsveldið fóru ekki fram hjá neinum. Flokkurinn stóð nær óskiptur með stóriðjuframkvæmdunum á Austurlandi sem bættu rækilega í skuldsetningu þjóðarbúsins og þensluna. Ingibjörg formaður tók höndum saman með Sjálfstæðisflokknum í borgarstjórn Reykjavíkur um að veita ríkisábyrgð fyrir Kárahnjúkavirkjun. Og nú er Össur sem iðnaðarráðherra kominn í forustu fyrir stóriðjusókninni og gefur þar í engu Framsókn eftir. Hér er því komið bindiefni í samflot þessara hentistefnuflokka. Hvort allir halda hópinn í því vanheilaga bandalagi er svo önnur saga.

Skúli Helgason: Krafa um breytingar á rétt á sér

Athugasemdir

[Sigurður Þórðarson, 16.1.2009 kl. 22:58]

Klerkurinn, samviska samfylingarmanna, kveinkar sér undan endurteknum mannréttidabrotum í sjávarútvegi. Kvennalistakonunum, femínistunum, í Samfylkingunni er skítsama. Gleraugu þeirra greina ekki misrétti gagnvart sjóbörðum körlum.

[Sigurbjörg, 16.1.2009 kl. 23:04]

Því miður er það svo að trúlega verða Íslendingar búnir að gleyma því hverjir bera ábyrgðina þegar kemur að næstu kosningum.  Það sýnir reynslan okkur.   Þess vegna vildu ríkisstjórnarflokkarnir að sjálfsögðu ekki kosningar fyrr en í fyrsta lagi næsta vor.

[Gunnlaugur B Ólafsson, 18.1.2009 kl. 23:39]

Heill og sæll kæri frændi

Munur milli Samfylkingar og Framsóknar er einkum sá að annar flokkurinn er með alþjóðlega tilvísan og erindi (social og democratic) en hinn staðsetur sig á einhverri miðju út frá öðrum og leitar að skemmstu leið til valda.

Það er þessi þáttur með lýðræðið sem mér hefur ekki þótt nógu þroskaður hjá vinstri grænum. Þar er skýrasta dæmið að hinum almenna flokksmanni er ekki gert mögulegt að kjósa um stefnu flokksins í Evrópumálum eins og allir aðrir flokkar hafa gert.

Varðandi stóriðju þá heyrði ég í formanni VG í útvarpsfréttum í gær þar sem að hann talaði fyrir kísilverksmiðju í Þingeyjarsýslum í stað álvers. Atvinnuleysi þessa svæðis hefur aukist um helming á einu ári. Steingrímur veit að þó eitthvað fiskist út á focking fock í Reykjavík þá gildir það ekki í hans byggðarlagi.

Er þessi málflutningur hentistefna hjá S. Joð?

Það væri gaman að fá þig og Kristínu í heimsókn ef þið eruð á sunnudagsbíltúr um Mosfellsbæinn.

                  Með góðri kveðju,

                                             Gunnlaugur

[Hjörleifur Guttormsson, 20.1.2009 kl. 17:03]

Sæll Gunnlaugur.

Þakka orðsendinguna og heimboðið.

Það getur verið álitamál hvernig flokkar eiga að standa að stefnumótun, m.a. hvort eigi að koma á undan eggið eða hænan. Frá stofnun VG hefur það verið skýr stefna og mat þorra flokksmanna að hagsmunum Íslands sé betur komið án aðildar að Evrópusambandinu. Þeir sem starfa í flokknum hafa markað þessa stefnu og almenningur þekkir hana. Félagar VG hafa fullan rétt til þess að hafa önnur sjónarmið og vinna þeim fylgi innan flokksins. Þeir sem leggja ofuráherslu á aðild að ESB hafa annan valkost eins og þú þekkir, þ.e. að styðja Samfylkinguna og nú reyndar einnig Framsóknarflokkinn ef marka má samþykktir hans.

Gaman væri að hittast við hentugleika.

Kveðjur í Mosfellsbæ

Hjörleifur