Þorskstofninn, sjávarútvegsráðherrann og varúðarnálgun

Hafrannsóknastofnun hefur talað skýrt. Hámarksafli þorsks á næsta fiskveiðiári verði 130 þúsund tonn. Í skýrslu Hafró stendur m.a.: "Stærð veiðistofns er nú metinn nálægt sögulegu lágmarki og stærð hrygningarstofnsins er aðeins um helmingur þess sem talið er að gefi hámarks afrakstur. Nýliðun síðustu sex árin hefur verið slök og meðalþyngd allra aldurshópa er í sögulegu lágmarki. Í ljósi þessa telur Hafrannsóknastofnunin mikilvægt að veiðihlutfall verði nú þegar lækkað og að aflamark á komandi árum miðist við 20% af viðmiðunarstofni í stað 25% sem verið hefur."

Þetta er niðurstaðan eftir að sjávarútvegsráðherrar hafa um áratugi hundsað ráðgjöf Hafró um árlegan hámarksafla í þorski og ákveðið að taka meira og stundum langtum meira en vísindaleg ráðgjöf hefur sagt til um. Þessi hentistefna hefur undið upp á sig og gjaldþrot hennar blasir nú við. Viðbrögð sjávarútvegsráðherrans á sjómannadegi bera þess hins vegar ekki vott að hann hyggist bæta ráð sitt. Þrástagast er á að 25% veiðireglan sem hann setti sjálfur gæfi að óbreyttu heimild til að veiða 178 þúsund tonn. Það er ekki að sjá að Einar K. hafi heyrt nefnda varúðarnálgun í fiskveiðum. Í stefnu Vinstri grænna undir yfirskriftinni Græn framtíð segir m.a. um það atriði:

"Við framkvæmd sjálfbærrar sjávarútvegsstefnu ber að taka mið af alþjóðsáttmálum og samþykktum. Ákvæði þeirra á að festa í sessi með því að lögfesta mikilvæga þætti er varða m.a. varúðar- og vistkerfisnálgun í fiskveiðum." Nánar er skýrt að varúðarnálgun snerti m.a. veiðar úr einstökum tegundum, aflareglur og skilgreiningu eða lögfestingu á líffræðilegum hættumörkum. - Það sýnist ekki vanþörf á að rétta sjávarútvegsráðherranum hjálparhönd svo að hann hlaupi ekki með fjöregg þjóðarinnar fyrir björg.

Athugasemdir

[Ómar Ragnarsson, 3.6.2007 kl. 23:02]

Já, þessar fregnir dynja yfir sömu dagana og sjómönnum er óskað heilla á sjómannadag. Listinn yfir það sem er að í íslenskum sjávarútvegsmálum er langur og ekkert lát virðist á. Ég var að koma frá hátíðarhöldum á Patreksfirði og var þar líka í fyrra.

Það er sláandi að sjá hver þróunin hefur verið síðan 2001 þegar ég var síðast heila sjómannadagshelgi á Patró. Þá var bátahöfnin stútfull af bátum og mikið líf í höfninni. 

Það var stórkostlegt að fylgjast með þessu mikla lífi í höfninni þar á þessum árum en nú er öldin önnur og ekki að sjá annað en að dökkt sé framundan.

Ég blogga nánar um þetta nánar á bloggsíðu minni í kvöld en má til að þakka þér Hjörleifur fyrir að vekja máls á þessu.

Þótt ekki sé annað en að minnast á allan þann gríðarlega afla sem veiddur hefur verið umfram ráðgjöf Hafró að viðbættu miklu meira brottkasti en menn fást til að viðurkenna ásamt löndum framhjá vigt er augljóst að vegna þessara stórkostlegu frávika erum við úti á túni eða öllu heldur ballahafi í þessum málum, því miður.