Hafnarfjörður: Á að endurtaka íbúakosninguna?

Allir vita að Jón Sigurðsson iðnaðarráðherra ræddi við forráðamenn Alcans í Straumsvík um stækkun verksmiðjunnar 25. apríl sl. þrátt fyrir niðurstöðu í íbúakosningunni í síðasta mánuði. Það kemur ekki á óvart. 

Mig rak hins vegar í rogastans við lestur Viðskiptablaðsins í gær, 9. maí. Þar er á forsíðu viðtal við Lúðvík Geirsson bæjarstjóra og oddvita Samfylkingarinnar þar sem hann boðar nýja íbúakosningu um stækkun álbræðslunnar í Straumsvík ef fram kemur krafa um það frá nógu mörgum Hafnfirðingum. Í viðtalinu segir Lúðvík  að ráðamenn Alcan séu að skoða hvaða leiðir séu færar. Orðrétt segir Lúðvík síðan:

 „Það er ekkert sem útilokar það að þeir vinni frekar með sínar deiliskipulagstillögur. Það er ekkert leyndarmál. Það var felld hér ákveðin tillaga en það er ekkert sem bannar mönnum að leggja málið fyrir með nýjum hætti til frekari skoðunar.”  Fyrirtækið hafi fullt frelsi til að kynna sínar hugmyndir um aðrar útfærslur. „Alcan hefur allt frelsi til að skoða sín mál og vinna sínar hugmyndir og leggja þær fyrir til umræðu og kynningar. Auðvitað myndum við fara yfir það.” Í lok viðtalsins minnir þessi oddviti Samfylkingarinnar á að samþykktir bæjarins geri ráð fyrir að íbúar sjálfir geti kallað eftir kosningum um deiliskipulag og það dugi að hafa samþykki 25% atkvæðisbærra manna til þess að fá fram atkvæðagreiðslu um nýtt deiliskipulag. Menn minnast þess eflaust að Lúðvík bæjarstjóri  og meirihluti Samfylkingarinnar í Hafnarfirði harðneituðu að gefa upp sína skoðun á stækkun hjá Alcan fyrir og eftir íbúakosninguna. Í ljósi ummæla bæjarstjórans nú er ljóst að sú þögn var engin tilviljun.

Athugasemdir

[Brynjar Hólm Bjarnason, 10.5.2007 kl. 22:37]

Þetta minnir óneitanlega mikið á eina mál Gunnars Birgissonar á þingi. Þá kom það í ljós að ef maður hefur bara nógu mikla þolinmæði og getur lagt málið fyrir aftur og aftur endar með því að það verður samþykkt, og þá er ekki aftur snúið. Skemmdaverkið orðið að staðreynd og enginn vill láta kalla sig afturhaldssinna og bera upp tillögu til að fella viðkomandi má aftur. Ég bendi á bók Einars Más Jónssonar, Bréf til Maríu, þar sem hann bendir á hvernig frjálshyggjan er að skemma velferðarþjóðfélagið á þennan hátt.

Brynjar H. Bjarnason