Dreifing kraftanna getur framlengt líf ríkisstjórnarinnar - segir JBH

Það er athyglisvert að lesa niðurstöðu Jóns Baldvins Hannibalssonar í Blaðinu í gær, laugardaginn 21. apríl, sem hann endurtók síðan í Silfri Egils í dag: Það sýni sig að framboð Íslandshreyfingarinnar sæki fylgi sitt frá þeim sem síst skyldi, Vinstri grænum og Samfylkingu, og sé á góðri leið með að bjarga ríkisstjórninni frá falli. Þetta er athyglisverð niðurstaða ekki síst í ljósi þess að Jón hafði áður lýst hrifningu sinni yfir framtaki Ómars og ljóst er að Ómar lagði hart að honum að taka sæti á framboðslista. Í þeirri viðleitni að fá Jón til liðs gekk Í-listinn svo langt að taka aðild að Evrópusambandinu upp í stefnuskrá sína, þótt það kostaði að hneppa Margrétu Sverrisdóttur í gíslingu, en hún hefur ítrekað líkt þeirri hugmynd við landráð. 

Orðrétt sagði Jón í Blaðinu:

"Ég hef legið undir mikilli ásókn frá ýmsum um að gefa kost á mér til framboðs og þar á meðal fyrir Íslandshreyfinguna. Það sem ég íhugaði var eftirfarandi: Ef hið sameiginlega markmið er að fella þessa ríkisstjórn, sem ég tel þjóðarnauðsyn, og endurteknar skoðanakannanir sýna að Vinstri grænum og Samfylkingu tækist það ekki, þá þyrfti að koma til þriðja aflið sem gæti ráðið úrslitum. Undir þessum formerkjum íhugaði ég, hvort réttlætanlegt væri að grípa til slíkra örþrifaráða. Ég tek það fram að ég ber virðingu fyrir hugsjónamanninum Ómari Ragnarssyni, sem þessi þjóð þekkir að góðu einu. En ég komst að lokum að þeirri niðurstöðu að dreifing kraftanna gæti haft þveröfug áhrif. Áhættan væri sú að nýtt framboð sækti fremur fylgi sitt frá þeim, sem síst skyldi, fremur frá Vinstri grænum og Samfylkingu en frá stjórnarflokkunum. Ef þannig færi væri verr af stað farið en heima setið."

Ljóst er að Jón hefur velt þessum orðum vel fyrir sér áður en þau voru sett á blað. Eftir er að sjá hvaða áhrif þessi eindregna aðvörun hans og fleiri hefur á þá sem vilja ríkisstjórnina feiga vegna stóriðjustefnunnar.

                                                                                 Hjörleifur Guttormsson

Athugasemdir

[Baldvin Jónsson, 22.4.2007 kl. 20:24]

Þetta er nú að verða ansi gömull lumma bara. Miðað við nýjustu tölur þá er Samfylkingin loksins að vakna til lífsins og tekur til sín mikið fylgi frá VG.  Miðað við þróun kannana má áætla að um 2-3% af fylgi VG í fyrstu könnun hafi verið frá óákveðnum umhverfissinnum sem töldu VG illskárri kost en D lista, en snéru sér að Íslandshreyfingunni þegar þeir fengu fram kost sem þeim líkaði á fleiri sviðum en í umhverfismálum.

Og t.d. í Reykjavík suður skv. nýjum tölum þar er atkvæði til Íslandshreyfingarinnar einmitt að tryggja að atkvæði falli ekki dauð niður eins og óttablandið hjal margra hefur verið að vísa til.

Í Reykjavík suður er íslandshreyfingin orðin mun betri valkostur en bæði Framsókn (Guði sé lof) og Frjálslyndir.  Atkvæði til Íslandshreyfingarinnar í R-suður myndi einmitt tryggja mann inn í stað stjórnarþingmanns Framsóknarflokks.

Það er frábær árangur.

[Guðsteinn Haukur Barkarson, 25.4.2007 kl. 17:55]

Ég skil hvað Hjörleifur, Jón Baldvin verður að gæta orða sinna til þess að skemma ekki fyrir öðrum, hann eins og allt hugsandi fólk, vill þessa ríkisstjórn burt. Ekki hjálpar það ef litlir grínistaflokkar taka fylgi sem hefði dugað til þess að fella hana. Ef Jón Baldvin ætlar að hjálpa vinstri mönnum, þá ætti hann að læra hemja munn sinn.