Dapurlegt hlutskipti Íslandshreyfingarinnar

Öllum hérlendis er heimilt að spreyta sig á vettvangi stjórnmálanna sem betur fer. Þeir sem ætlast til að vera teknir alvarlega komast hins vegar ekki hjá því að gera grein fyrir erindi sínu. Það hefur Íslandshreyfingin ekki gert enn sem komið er. Formaðurinn Ómar Ragnarsson segir að helsta erindi þessa framboðs eigi að vera að höfða til umhverfisssinnaðra kjósenda sem ella myndu kjósa annan hvorn núverandi stjórnarflokka. Íslandshreyfingin sé flokkur hægramegin við miðju. Þetta er ekki sannfærandi, hvorki miðað við framkomna stefnu á blaði né það fólk sem undanfarið hefur talað máli Í-listans. Ómar þyrfti að fara heljarstökk til að verða sannfærandi "hægrimaður", Margrét var talin vinstrisinnuð meðan hún var hjá Frjálslyndum, Jakob var til skamms tíma varaþingmaður í Samfylkingunni og Ósk hefur ekki vakið á sér athygli fyrir annað en að tala máli umhverfisverndar. Það er því ráðgáta hvernig þetta góða fólk telur sér trú um að það muni sækja fylgi til hægri umfram þá flokka sem fyrir eru í stjórnarandstöðu.   

Skoðanakannanir að undanförnu bera þess heldur ekki vott að kjósendur meti stöðuna öðruvísi. Sjálfstæðisflokkurinn hefur heldur verið að sækja í sig veðrið, annars gott og vaxandi fylgi við Vinstri græna hefur heldur verið að dala eftir að Í-listinn kom fram og stjórnarandstaðan verður ótrúverðugri kostur sem heild eftir því sem framboðum fjölgar á þeim væng. Sú hætta hefur jafnframt aukist með tilkomu Í-listans að ríkisstjórnin haldi meirihluta sínum á Alþingi eftir kosningar, jafnvel þótt hún nyti ekki stuðnings meirihluta kjósenda. Það er dapurlegt hlutskipti fyrir þá sem að Í-listanum standa að hætta slíku til. Það vantar heldur ekki framboð sem standa fyrir umhverfisvernd og stóriðjustopp og hafa Vinstri grænir raunar gert það af þrótti tvö undanfarin kjörtímabil. Fylgi við þann málstað hefur verið að vaxa óðfluga. Ég hef satt að segja verið að vona að Ómar og aðrir sem að Í-listanum standa sjái sig um hönd í tæka tíð.

Hjörleifur Guttormsson

Athugasemdir

[Baldvin Jónsson, 11.4.2007 kl. 20:30]

Sælir. Í sambandi við athugasemd þína á blogginu hjá mér með ESB aðildarviðræður X-Í að þá voru orð Lárusar slitin úr samhengi þarna í gær. Hann var í raun einungis að segja það sama og nánast allir aðrir þarna. Að Íslandshreyfingin vill á næsta kjörtímabili hefja viðræður um aðild með það í huga að semja um yfirráð yfir auðlindum okkar og fiskimiðum m.a. sem ég er reyndar ekkert bjartsýnn á að ESB stjórar vilji skoða neitt frekar hjá okkur en frændum okkar Norðmönnum.

Varðandi örlítið fylgistap VG, þá gerist það í framhaldi af opinberri birtingu stefnuskrár ykkar í framhaldi af landsfundi og þ.a.l. mjög eðlilegt að örlítið dragi úr hjá ykkur. Flestum okkar finnst stefna ykkar ganga heldur langt þegar kemur að veskjum landsmanna.

Ég hef afar litla trú á því að framboð Íslandshreyfingarinnar geti haft afgerandi áhrif á framboð VG, ég vona hins vegar innilega að framboðið megi verða til að styrkja hugmyndina um stóriðjustopp.

Megin ástæða þess að ríkisstjórnin á möguleika á að halda í mínunm bókum er fyrst og fremst skrifuð á stórkostlegt fylgishrun Samfylkingarinnar, fylgishrun sem virðist að mestu vera afleiðing algers glundroða og verulegs skorts á stefnu. Jú jú, þeir keppast við það núna að birta fallegar stefnuyfirlýsingar en það virðist ekki vera neitt þar sem má ekki túlka eftir því með hverjum þeir starfa í stjórn, ef þeir komast að þar.

Það er pólitík sem mér líkar illa, einmitt meginástæða þess að ég t.d. get ekki hugsað mér að kjósa til þeirra á þessu vori.

[Hjörleifur Guttormsson, 11.4.2007 kl. 20:57]

Sæll Baldvin. Þakka sendingu.

Þú staðfestir að Íslandshreyfingin vilji leita samninga um aðild að ESB eftir kosningar. Ég spái ekki góðu fyrir þann leiðangur.

Það er misskilningur hjá þér að dregið hafi úr fylgi VG vikurnar eftir landsfundinn í febrúar. Það gagnstæða gerðist þangað til Í-listinn kom fram. Um það vísa ég þér á grein á heimasíðu minni www.eldhorn.is/hjorleifur sem ber heitið Vandi Íslandshreyfingarinnar.

Auðvitað hafa allir rétt til að leita eftir stuðningi kjósenda. En ég tel framboð Ómars mjög vanhugsað og því miður geta orðið til þess að framlengja enn valdaskeið slæmrar stóriðjustjórnar.

Bestu kveðjur                              Hjörleifur

[Baldvin Jónsson, 11.4.2007 kl. 21:50]

Þakka sömuleiðis.

Tók ekki bara einhverja kjósendur þessar 3-4 vikur frá landsfundi til að melta stefnuskrá VG?  Veit a.m.k. af ansi mörgum græningjanum í kringum mig sem fékk eigingjarnan verk í veskið (eins og ég) þegar að þeir lásu yfir stefnuskránna.

En frekar vil ég fórna einhverjum krónum til skattahækkana og ná árangri með stóriðjustoppið.  Vonandi að við náum öll flugi á komandi mánuði.

Stjórnarflokkarnir munu núna á næstu vikum gera allt sem þeir mögulega geta til að koma umræðunni frá umhverfi og velferðarmálum, inn í umræðu um arð og hagnað.  Við þurfum öll að standa saman gegn því.

[Sigurður Hrellir, 13.4.2007 kl. 16:08]

Sæll Hjörleifur. Ég vil benda á grein sem ég skrifaði í dag eftir að hafa lesið pistil þinn í Fréttablaðinu. Kveðja, Sigurður.