Eitthundrað sendu forystu VG áskorun vegna ESB-umsóknar

Á málþingi VG um utanríkismál fyrir helgina var lögð fram áskorun undirrituð af 100 félögum og stuðningsmönnum flokksins víða að af landinu svohljóðandi:

"Við undirrituð félagar og stuðningsfólk Vinstrihreyfingarinnar græns framboðs hvetjum forystu flokksins til að beita sér gegn aðild Íslands að Evrópusambandinu og aðlögunarferli sem hefur slíka aðild að markmiði.  

 

Á því rúma ári sem liðið er frá því naumur meirihluti Alþingis tók ákvörðun um aðildarumsókn hafa forsendur breyst í grundvallaratriðum. Umsóknin snýst ekki lengur um að kanna hvað í boði er af hálfu ESB, eins og áður var látið í veðri vaka, heldur er nú að hefjast flókið ferli aðlögunar að regluverki og stofnanakerfi ESB með milljarða fjáraustri frá Brussel. Slíkar greiðslur frá Evrópusambandinu gera að engu þær vonir að hér fari fram lýðræðisleg og hlutlæg umræða um kosti og galla aðildar.   

 

Í öðru lagi hefur komið skýrt fram hjá stækkunarstjóra ESB að Evrópusambandið veitir ekki varanlegar undanþágur frá meginreglum Lissabonsáttmálans, m.a. þeirri reglu að Evrópusambandið tekur sér úrslitavald til yfirráða yfir sjávarauðlindum aðildarríkjanna. Nýleg viðbrögð Evrópusambandsins við veiðum íslenskra skipa á makríl í íslenskri lögsögu sýna áþreifanlega hvers er að vænta ef þjóðin afsalar sér samningsrétti um veiðar úr deilistofnum í hendur ESB.   

 

Í þriðja lagi hafa allar skoðanakannanir seinasta árið sýnt andstöðu yfirgnæfandi meirihluta kjósenda við aðild Íslands að ESB. Áframhaldandi aðlögunarferli er því gróf ögrun við lýðræði í landinu.   

 

Vinstrihreyfingin grænt framboð hefur margítrekað andstöðu sína við ESB-aðild, m.a. fyrir seinustu alþingiskosningar.  Öll þessi atburðarás er í fullkominni andstöðu við stefnu VG og fyrirheit forystumanna flokksins. Við undirrituð gerum skýlausa kröfu um að trúnaðarmenn VG fylgi stefnu flokksins, bæði í orði og á borði."    

 

Hér var um táknræna aðgerð en ekki almenna undirskriftasöfnun að ræða. Viðbrögð forystunnar við áskoruninni munu væntanlega koma í ljós á næstu vikum. 

 

Athugasemdir

[Guðlaugur Hermannsson, 25.10.2010 kl. 21:39]

Það eru 220 þúsund kjósendur í landinu. Hundrað er bara prómil af kjósendum.

[Helga Kristjánsdóttir, 25.10.2010 kl. 22:17]

Greinilegt er að fólk vill og getur sameinast,þegar fullveldi Íslands er í húfi. Við tilkynnum ekki pólitísk viðhorf okkar, eða hverrar trúar við erum,heldur afdráttarlausa andstöðu við aðild.  Með henni stöndum við saman í trú á landið okkar. Með þökk fyrir, Íslandi allt. 

[Kjartan Sigurgeirsson, 26.10.2010 kl. 00:40]

Er ekki tvíbent að krefjast þjóðaratkvæðagreiðslu um aðlögunarsamninga að ESB núna? það sem mér finnst varasamt er að verði meirihluti fyrir því að halda viðræðum áfram, er hætt við að Evrópusinnar í Ríkisstjórninni telji að búið sé að halda þjóðaratkvæða greiðslu um aðild.  Ég tel verulegar líkur á að meirihluti kjósenda hafi áhuga á að sjá hvað kemur úr hattinum sem Össur lofað að upplýsa að loknum viðræðum.

Fyrst Samfylkingin gat blekkt bæði samstarfsflokk sinn og reyndar þjóðina alla um að við værum að fara í könnunarviðræður en ekki aðlögun eins og reyndin virðist vera, treysti ég því fólki ekki, eða frekar treysti ég þeim fullkomlega til að koma okkur í ESB með góðu eða illu og beiti við það öllum hugsanlegum brögðum

[Gunnar Waage, 26.10.2010 kl. 02:27]

Eins og þú segir þá mun koma fram á næstunni hvaða afleiðingar starfshættir þingflokksins hafa á heildina.

Ég tel að eðlilegt sé að taka þetta mál inn í atkvæðagreiðlu um stjórnlagaþing. Það er þekkt í nágrannalöndum okkar að spyrða sem flest mál við atkvæðagreiðslur þar sem að þær eru mjög dýrar og slíkt fyrirkomulag sparar fé.

[Guðlaugur Hermannsson, 26.10.2010 kl. 04:51]

Undarleg rök hjá þér Gunnar. Nú er aðalatriðið að spara peninga með því að taka þetta mál upp í kosningu til stjórnlagaþings. Til hvers ansk... að taka þetta til atkvæðagreiðslu áður en við höfum fengið niðurstöðu í viðræðunum?

Kjartan bendir réttilega á að ef greidd verða atkvæði um áframhald viðræðnanna þá eru kjósendur að samþykkja (svo langt sem það nær) aðildarviðræður.

Hversu mótfallin sem þið eruð þá mun meirihlutinn ráða á endanum hvort sem Alþingi afgreiðir þetta eða þjóðaratkvæðagreiðslan.

Við erum ekki að "ganga inn í" ESB við munum taka þátt í ESB samstarfinu sem fullgild þjóð og fullgildir meðlimir þess. Við erum í EES aðild en það er ekki nóg. Aðild mun færa okkur gæfu.

[Elle_, 26.10.2010 kl. 14:51]

Ekkert undarleg rökin hans Gunnars.  Og þetta er sannarlega gróf ögrun við lýðræðið í landinu að fara fram með aðlögun inn í erlent ríki sem við fengum aldrei tækifæri til að synja eða velja.  Og hefði aldrei átt að vera sótt um í fyrstunni. 

Umsóknin sjálf var blekking og beint pólitískt ofbeldi.  Og ruddaleg ögrun.  Við ættum að þurfa minnst 70-75% stuðning hjá þjóðinni til að geta afsalað okkur fullveldinu undir erlent ríki eða vald, ekki 51%.  Vildi líka geta skrifað undir..